Azərbaycanda pensiya kapitalı 2026-cı ildə təxminən 6 faiz artırılacaq – deputat

Azərbaycanda vətəndaşların pensiya kapitalı 2026-cı ildə indeksləşdirilərək artırılacaq. Bu barədə deputat Vüqar Bayramov öz sosial hesabında bildirib.

Bayramovun sözlərinə görə, “Əmək Pensiyaları haqqında” Qanunun 29.1-1 maddəsinə əsasən, sığortaolunanların fərdi hesablarında toplanan pensiya kapitalı hər il istehlak qiymətləri indeksinə uyğun şəkildə indeksləşdirilir. “Bu o deməkdir ki, pensiya kapitalları 2025-ci ildəki illik inflyasiya səviyyəsinə əsasən artırılacaq”, – deputat deyib.

Mərkəzi Bankın 2025-ci il üçün proqnozuna görə, ölkədə illik inflyasiya 6,0 faiz olacaq. Dövlət Statistika Komitəsinin məlumatına əsasən, ilin ilk doqquz ayında istehlak qiymətləri indeksi 5,7 faiz təşkil edib.

Bayramov bildirib ki, əgər proqnoz göstəricisi dəyişməz qalsa, vətəndaşların pensiya kapitalı təxminən 6 faiz artacaq. “Məsələn, 50 min manat pensiya kapitalına malik şəxs üçün bu artım təxminən 3 min manat olacaq. Dəqiq göstərici 2026-cı ilin yanvarında elan ediləcək,” – o əlavə edib.

Deputat qeyd edib ki, bu artım pensiya kapitalının inflyasiyadan qorunması və gələcəkdə vətəndaşların daha yüksək pensiya alması baxımından əhəmiyyətlidir.

Azərbaycan qanunvericiliyinə əsasən, pensiya kapitalı hər il inflyasiya səviyyəsinə uyğun indeksləşdirilir. Ölkədə son beş ildə orta illik inflyasiya 5–8 faiz aralığında dəyişib. 

Aytac