20% neftçıxarma əmsalı artıq qəbuledilməzdir - SOCAR vitse prezidenti

Azərbaycanın köhnə neft yataqlarında tarixən qəbul edilən 20%-lik neftçıxarma əmsalı müasir texnologiyalar fonunda artıq qəbuledilməzdir və şirkət hasilatı artırmaq üçün bütün imkanlardan istifadə etməyi prioritet sayır. Bu barədə SOCAR vitse prezidenti Babək Hüseynov bildirib.

O deyib ki, Sovet dövründən bəri mövcud olan texniki baza son 30 ildə kəskin dəyişib və bu, qalıq ehtiyatların daha böyük hissəsinin hasilatına imkan verir. 

“Mənim üçün yatağın cəmi 20%-ni çıxardıqdan sonra dayanmaq qəbulolunmazdır,” — Hüseynov bildirib.

SOCAR rəsmisi BP ilə 30 illik tərəfdaşlığı vurğulayaraq qeyd edib ki, tərəflər hazırda yaşıl sahə deyil, “qəhvəyi sahə” yanaşmasına fokuslanır və bu, tamamilə fərqli düşüncə və bacarıqlar tələb edir. 

Onun sözlərinə görə, SOCAR yeni texniki həllər və mövcud razılaşmaların yenidən baxılması da daxil olmaqla bütün variantlara açıqdır.

Hüseynov əlavə edib ki, şirkətin məqsədlərindən biri də artıq tükənmiş sayılan yataqların yenidən qiymətləndirilməsi və bərpasıdır. 

O, xüsusilə “Bahar”yatağını misal çəkib — burada neftçıxarma əmsalı 10%-dən aşağı olub, sahə faktiki olaraq “bitmiş” hesab edilirdi. 

Lakin aparılan yeni işlər yatağın böyük potensiala malik olduğunu göstərib.

O, həmçinin qeyd edib ki, kəşfiyyat SOCAR üçün ehtiyatların yenilənməsi baxımından əsas istiqamətlərdən biri olaraq qalır.

N.Təbrizli