Azərbaycanla yükdaşımalar dörd ildə yeddi dəfə artıb - Talğat Oldabekınov

Qazaxıstan və Azərbaycan arasında yükdaşımalar son dörd ildə yeddi dəfə artıb. Bu barədə “Qazaxıstan Dəmir Yolları”nın (KTZ) idarə heyətinin sədri Talğat Oldabekınov çərşənbə günü bildirib.

Oldabekınovun sözlərinə görə, 2025-ci ilin ilk on ayında daşımaların həcmi 4,1 milyon ton olub. Artımın əsas hissəsi taxıl yüklərinin payına düşüb.

“Taxıl daşımaları 25 dəfə artıb və bu il təxminən 600 min ton təşkil edib,” – o, Bakıda keçirilən MDB Dəmir Yolu Şurasının iclasında deyib.

O bildirib ki, Transxəzər Beynəlxalq Nəqliyyat Marşrutu (Orta Dəhliz) üzrə konteyner daşımaları cari ildə 12% artaraq 917 qatar təşkil edib. 

Çin şirkəti Xinjiang REI iki həftə əvvəl dəhlizə qoşulub və KTZ bunun həcmləri iki dəfə artıracağını gözləyir.

KTZ rəhbəri qeyd edib ki, Qazaxıstan, Azərbaycan və Gürcüstan dəmir yolları sərhəddən Gürcüstan limanlarınadək bütün xətt üzrə 10 günlük audit aparıb və dar boğazlar müəyyən olunub.

Oldabekınov deyib ki, əsas maliyyə tələbatı Xəzər dənizində gəmi parkının genişləndirilməsidir. Qazaxıstan altı konteyner gəmisi alır və onların 2027-ci ilin ilk yarısında istifadəyə veriləcəyi gözlənilir.

Aktau limanında konteyner gücü artırılır: 140 min TEU-luq ilk mərhələ ilin sonunadək, ümumi gücü 240 min TEU-ya çatdıran ikinci mərhələ isə 2026-cı ildə istifadəyə veriləcək.

Aytac Zeynalova