SOCAR və MVM 2026-dan qüvvəyə minəcək qaz sazişi ilə enerji tərəfdaşlığını genişləndirir

Azərbaycan Dövlət Neft Şirkəti (SOCAR) ilə Macarıstanın "MVM ONEnergy" şirkəti arasında təbii qaz təchizatına dair imzalanmış və 1 yanvar 2026-cı ildən qüvvəyə minəcək saziş iki ölkə arasında strateji enerji əməkdaşlığının dərinləşməsinə xidmət edəcək. Bu barədə SOCAR prezidenti Rövşən Nəcəf "MVM Group"un baş icraçı direktoru Karoly Matrai ilə görüşdə bildirib.

Yeni təchizat sazişi tərəflər arasında mövcud müqavilənin davamı kimi hazırlanıb. Son illərdə şirkətlər arasında əməkdaşlıq etibarlı və qarşılıqlı faydalı tərəfdaşlıq formatında inkişaf edib və sazişin uzadılması uzunmüddətli enerji əməkdaşlığına sadiqliyi nümayiş etdirir.

Görüşdə tərəflər enerji sektorunun müxtəlif istiqamətləri üzrə cari layihələri nəzərdən keçirib və gələcək əməkdaşlıq imkanlarını müzakirə ediblər. Söhbət qaz tədarükünün genişləndirilməsi, infrastruktur layihələri, davamlı enerji həlləri və regional enerji təhlükəsizliyi sahəsində əməkdaşlıq perspektivlərindən gedib.