TotalEnergies Abşeronun ikinci mərhələsinin icrasına ilin sonunadək başlamağı planlaşdırır

TotalEnergies Abşeron qaz-kondensat yatağının işlənməsinin ikinci mərhələsi üzrə tender mərhələsindədir və layihənin icrasına bu ilin sonunadək başlamağı planlaşdırır. Bunu TotalEnergies Azerbaijan şirkətinin rəhbəri Emmanuel de Giybon bildirib.

Onun sözlərinə görə, ikinci mərhələ üzrə yataq tədqiqatları artıq tamamlanıb.

İkinci mərhələ üç yeni quyunun dənizaltı işlənməsini nəzərdə tutur. Hər bir quyudan gündə təxminən 40 min barel neft ekvivalenti hasil ediləcək ki, bunun da 70%-i qazın, 30%-i isə kondensatın payına düşəcək.

Layihə məhsulun yataqdan birbaşa sahilə nəql edilməsi üçün 140 kilometrlik boru kəmərinin tikintisini nəzərdə tutur. Bu zaman dənizdə hasilat platformalarından istifadə olunmayacaq.

De Giybon bildirib ki, qazın bir hissəsi Cənubi Qafqaz Boru Kəməri (SCP) vasitəsilə Türkiyəyə ixrac ediləcək, digər hissəsi isə Azərbaycanın daxili bazarına yönəldiləcək.

“Dünən BOTAS ilə qaz satışı müqaviləsi imzaladıq”, - o deyib.

Onun sözlərinə görə, üç yeni quyu mövcud erkən hasilat mərhələsindəki gündəlik 40 min barel neft ekvivalenti hasilata əlavə olaraq təxminən 120 min barel neft ekvivalenti hasilat təmin edəcək.

De Giybon qeyd edib ki, şirkət SOCAR və XRG ilə birlikdə gələcəkdə əlavə quyuların qazılması imkanlarını araşdırır.

“Abşeron çox böyük yataqdır. Gələcəkdə əlavə quyuların qazılacağına ümid edirik, lakin bu planlar hələlik işlənmə mərhələsindədir”, - o bildirib.

Gülnar Nazimqızı