Azərbaycanın gələnilki dövlət büdcəsinin gəlir və xərcləri açıqlanıb

2027-ci ildə Azərbaycanın dövlət büdcəsinin gəlirlərinin 39 milyard 234 milyon manat, xərclərinin isə 42 milyard 400 milyon manat olacağı proqnozlaşdırılır.Bu barədə Maliyyə Nazirliyindən məlumat verilib.

Məlumata görə, büdcə gəlirləri 2026-cı ilin təsdiq olunmuş proqnozu ilə müqayisədə 1,6 %, xərclər isə 1,7 % artacaq.

Nəticədə 2027-ci ildə dövlət büdcəsində 3 milyard 166 milyon manat kəsir yaranacağı gözlənilir. Bu, proqnozlaşdırılan ümumi daxili məhsulun 2,2 %-nə bərabərdir və 2026-cı ilin göstəricisi ilə müqayisədə 2,3 % çoxdur.

Proqnoza əsasən, dövlət büdcəsi gəlirlərinin 15 milyard 480 milyon manatı və ya 39,5 %-i neft-qaz sektorunun, 23 milyard 754 milyon manatı və ya 60,5 %-i qeyri-neft-qaz sektorunun payına düşəcək.

Büdcə xərclərinin 26 milyard 400 milyon manatının və ya 62,3 %-nin cari xərclərə, 13 milyard 800 milyon manatının və ya 32,5 %-nin əsaslı xərclərə, 2 milyard 200 milyon manatının və ya 5,2 %-nin isə dövlət borcuna və öhdəliklərinə xidmətlə bağlı xərclərə yönəldilməsi nəzərdə tutulur.