Azərbaycan Almaniya üçün regional platformadır - nazir müavini

Azərbaycan Almaniya şirkətləri üçün yalnız 10 milyonluq bazar deyil, Xəzəryanı region, Mərkəzi Asiya və Cənubi Qafqazı əhatə edən investisiya və texnologiya əməkdaşlığı platformasıdır. Bunu Bakıda keçirilən Alman-Azərbaycan Strateji Tərəfdaşlıq və Bağlantılar Konfransında iqtisadiyyat nazirinin müavini Səməd Bəşirli bildirib.

"Almaniya şirkətləri üçün əsas təklif Azərbaycanda yerləşərək daha geniş region üçün istehsal həyata keçirməkdir. bu yanaşma Mərkəzi Asiya xammalını ölkəmizdə emal edərək Avropa və Türkiyə bazarlarına çıxarmaq imkanı yaradır", - Bəşirli bildirib.

Nazir müavini bu ilin noyabrında Almaniyaya səfər ediləcəyini və Azərbaycan-Almaniya Biznes Şurasının ilk iclasının keçiriləcəyini vurğulayıb.

Bəşirli Ələt Azad İqtisadi Zonasının əlavə dəyər yaradan investisiyalar üçün hazır olduğunu, Yaşıl Enerji Dəhlizi və Trans-Xəzər Fiber-Optik Kabel layihələrinin beynəlxalq tərəfdaşlar üçün geniş imkanlar açdığını bildirib.

O əlavə edib ki, 2026–2029-cu illər Rəqəmsal İqtisadiyyat Strategiyası çərçivəsində 2030-cu ilədək 300-dək yerli şirkətin "Sənaye 4.0" texnologiyaları və süni intellekt əsasında rəqəmsal transformasiyası dəstəklənəcək.

N. Təbrizli