Nyu-Yorkda Üzeyir Hacıbəyli musiqisinə həsr olunan gecə keçirilib

Nyu-Yorkda Azərbaycan bəstəkarı Üzeyir Hacıbəylinin 140 illiyinə həsr olunan “Firuzə: Musiqi mozaikası” adlı konsert təşkil olunub.

Tədbir Azərbaycan Respublikasının Diasporla İş üzrə Dövlət Komitəsinin dəstəyi ilə baş tutub. Konsertdə Azərbaycanın, Türkmənistanın, Türkiyənin və Qazaxıstanın BMT yanındakı daimi nümayəndəliklərinin rəhbərləri, diplomatlar və Azərbaycan diasporunun nümayəndələri iştirak ediblər.

Gecədə Əməkdar artist, pianoçu Nərgiz Əliyarova və skripkaçı Karen Bentley Pollack çıxış ediblər. Onlar Üzeyir Hacıbəyli, Qara Qarayev, Firəngiz Əlizadə, Ləla Cəfərova, eləcə də digər ölkələrdən bəstəkarların — Nuri Halməmmədov (Türkmənistan), Dilorom Amanullayeva (Özbəkistan), Nurlan Moldobasanov (Qırğızıstan), Ariya Torkanburi (İran) və Fazıl Say (Türkiyə) əsərlərini ifa ediblər.

Tamaşaçılar arasında ən çox maraq doğuran ifalardan biri Qazaxıstanın xalq mahnısı “Yapıraý” olub.

Konsertin məqsədi müxtəlif xalqları və mədəniyyətləri musiqi vasitəsilə birləşdirmək olub.

N.Təbrizli