Bu gün Milli Məclisin İqtisadi siyasət, sənaye və sahibkarlıq və Hüquq Komitələrinin birgə iclası keçirilib.

 

"APA-Economics"in məlumatına görə, İqtisadi siyasət, sənaye və sahibkarlıq komitəsinin sədri Ziyad Səmədzadə bildirib ki, iclasın keçirilməsində məqsəd Milli Məclisin bu gün keçiriləcək növbədənkənar sessiyasında gündəliyə daxil olan 7 məsələnin müzakirə olunmasıdır.

 

Z. Səmədzadə bildirib ki, dünyada baş verən qlobal problemin şiddətlənməsinə baxmayaraq Azərbaycan dinamikliyini, iqtisadi sabitliyini qoruyub saxlayır. Bundan başqa, o bildirib ki, prezident İlham Əliyevin də dünən nazirlərlə görüşündə qeyd etdiyi kimi sosial proqramların icrasında heç bir problem olmayacaq, davam etdiriləcək. Dünyada baş verən ağır qlobal proseslərə baxmayaraq, Azərbaycan inkişaf üçün əlavə inkişaf imkanları tapmalıdır. Bunun üçün ilk növbədə real sektora qeyri-neft sektorunun inkişafına diqqət yetirilməlidir.

 

Daha sonra Mərkəzi Bankın İdarə Heyətinin sədri Elmar Rüstəmov bildirib ki, qlobal iqtisadi böhran şəraitində ölkədə yeni şəraitə uyğun yeni sistem, yeni strategiya və siyasət formalaşdırılmalıdır. Bu siyasətin əsas konturları prezident İlham Əliyevin 2015-ci ilin sosial inkişafına dair iclasında və dünən keçirilən iclasda çıxışında öz əksini tapıb. E. Rüstəmov qeyd edib ki, bütövlükdə iqtisadi strategiyası bir neçə əsas məsələlərin üzərində formalaşır. O, bildirib ki, dünyada baş verən qlobal iqtisadi proseslər Azərbaycana təsir edir. Bunun üçün qlobal iqtisadi şokları neytrallaşdırmaq lazımıdır. E. Neftin qiymətinin aşağı düşməsi səbəbindən bu iqtisadi şokları nəzərə almamaq mümkün deyil. Buna görə də, qarşıda duran əsas məsələ iqtisadi sabitliyin tam qorunmasına nail olmaqdır.

 

İkinci məsələ, yeni iqtisadi artım modellərinin yaradılması ilə bağlı təkliflər paketi irəli sürülüb. Üçüncü isə, neft iqtisadiyyatından yeni bir iqtisadiyyata, bütövlükdə iqtisadiyyatın şaxələndirilməsi yəni liberal iqtisadiyyata keçid təmin olunmalıdır. "Əmanətlərin tam sığortalanması haqqında" və "Valyuta tənzimi haqqında" qanunlara toxunan E. Rüstəmov qeyd edib ki, bütövlükdə MDB məkanında heç bir ölkədə belə bir qanun qəbul edilməyib: "Bu qanunların məqsədi stabilliyi qorumaq, islahatların aparılması və inkişafa əsaslanıb".

 

E. Rüstəmov bildirib ki, bank sektoru bütövlükdə sabitdir: "Bu ağır iqtisadi şəraitdə 1-2 bank çox zəiflik nümayişlik elətdirib. Onların ödəmə qabiliyyətində problem oldu. Amma bank sektorunda vəziyyət bütövlükdə sabitdir. Bu gün bank sektorunda kifayət qədər likvidlik var. Azərbaycanın bank sektorunda kapitalın adekvatlıq səviyyəsi 14%-dir. Düzdür, problemlər var, hər şeyi çəhrayı rəngdə təqdim etmək fikrində deyilik. Bu qanunlar imkan verir ki, iqtisadi sabitlik vəziyyəti daha da qorunsun".

 

E. Rüstəmov "Əmanətlərin tam sığortalanması haqqında" qanun layihəsi barədə məlumat verərək bildirib ki, sənəd bütün əmanətlərin qorunmasını nəzərdə tutur: "Bu qanunda manatla əmanətlərə böyük üstünlük verir. Təbii ki, indi də manat və dollarla əmanətlərə banklar faiz tətbiq edirlər. Yeni faiz dərəcəsi ilə bağlı Əmanətlərin Sığortalanması Fondunun Himayəçilik Şurası yeni qərarı olacaq. Əsas məsələ burada manata etimadın qorunması məsələsidir. Əmanətlərin tam sığortalanması haqında qanun layihəsi yeni qanun layihəsidir. Bu imkan verəcək ki, 6 milyondan çox əmanətçinin əmanətləri tam məbləğdə sığortalansın. Bu dövlət tərəfindən böyük bir qarantiyadır".