XİN- dən Azərbaycanın daxili işlərinə yersiz müdaxilələrlə bağlı çağırış

Xarici İşlər Nazirliyi (XİN) Azərbaycan vətəndaşları Anar Məmmədli, Bəşir Süleymanlı və Elnur Məmmədovun mühakimə olunması ilə bağlı Böyük Britaniyanın Xarici işlər və Birlik məsələləri üzrə Ofisinin 28 may tarixli bəyanatını Azərbaycanın müstəqil məhkəmə instansiyalarının işinə müdaxilə və təzyiq kimi qiymətləndirir və tam şəkildə qəbuledilməz hesab edir. 

XİN mətbuat xidmətindən APA-ya verilən məlumata görə, adları sadalanan şəxslər vergidən yayınma və qanunsuz sahibkarlıq fəaliyyəti kimi qanun pozuntularına görə mühakimə olunublar və bu şəxslərin cinayət əməlləri məhkəmə qaydasında sübuta yetirilib:

 “Məhkəmənin qərarının bu şəxslərin siyasi fəaliyyəti ilə heç bir əlaqəsi yoxdur və ümumiyyətlə, Azərbaycanda heç kim siyasi baxışlarına və fəaliyyətinə görə təqib və mühakimə olunmur”.

 Azərbaycan XİN Böyük Britaniyanın Xarici işlər və Birlik məsələləri üzrə Ofisini Azərbaycanın daxili işlərinə son zamanlar müşahidə olunan yersiz müdaxilələrdən çəkinməyə və öz ölkəsinin insan hüquqları məsələlərinə diqqət yetirməyə dəvət edir.

ANN.Az