Xocalıda keçirilən görüş nələri dəyişə bilər? - Açıqlama

Bu gün Milli Məclisin deputatı Ramin Məmmədov Xocalıda  Azərbaycan ərazisində müvəqqəti yerləşdirilmiş Rusiya sülhməramlı kontingentinin qərargahında Azərbaycanın Qarabağ bölgəsində yaşayan erməni sakinlərin təmsilçiləri ilə görüşüb.

 

 

 

Milli Məclisin deputatı Hikmət Babaoğlu bu görüşün Qarabağ icmasının Azərbaycana reinteqrasiyası məsələsinin müzakirəsi, onların humanitar problemlərinin həlli ilə bağlı məsələlərə baxılması üçün vacib olduğunu bildirib.

 

"Bu vacib bir görüşdür. Eyni zamanda Qarabağ icmasının Azərbaycana reinteqrasiyası bağlı humanitar problemlərinin həlli məsələlərin müzakirə olunması üçün vacib sayılır. Biz bu görüşlərdən sonra növbəti belə görüşlərin daha intensiv keçirilməsini proqnozlaşdırırıq. Şübhəsiz ki, görüşdə müzakirə olunan məsələlər  təkcə humanitar məsələlər deyil, həm də Azərbaycanın ərazisində qeyri-qanuni istismar olunan ekoloji yataqlar müzakirə ediləcək.  Bu günki görüşdə çox güman ki,  Azərbaycanda yaşayan erməni icmasının nümayəndələri öz problemlərini  dilə gətiriblər. Məsələnin mahiyyəti bundan ibarətdir. Erməni icmasının əsas məqsədi humanitar problemlərinin həll olunmasıdır. Azərbaycan vətəndaşlığının verilməsi məsələsi indiki mərhələdə müzakirə olunması hələ tezdir. Qarabağda yaşayan erməni icmasının bu prosesə hazırlaşması məsələsi gündəmə gələ bilər,- deputat vurğulayıb.

 

Hikmət Babaoğlu deyir ki, Azərbaycan hər kəsə vətəndaşlıq verməyəcək.

 

"Bu Azərbaycan qanunları ilə müəyyənləşəcək. Azərbaycan qanunlarının pozmayan icma nümayəndələrinə vətəndaşlıq verilə bilər. Sülhün əldə olunması üçün Ermənistan vətəndaşlarının Azərbaycana reinteqrasiyasında bu mərhələdən mütləq keçilməlidir",- deputat əlavə edib.

 

Aytac Zeynalova