Ər-Riyadda Rusiya-ABŞ danışıqları başa çatıb - Yenilənib

Səudiyyə Ərəbistanının paytaxtında Amerika və Rusiya nümayəndə heyətləri arasında danışıqlar yekunlaşıb. Görüşdə iştirak edən Rusiya prezidentinin köməkçisi Yuri Uşakov danışıqların uğurlu keçdiyini bildirib.

Rusiya mətbuatı xəbər verir ki, Uşakov tərəflərin gələcəkdə bir-birinin maraqlarını nəzərə almağa razılaşdıqlarını deyib.

O, qeyd edib ki, Putinlə Trampın görüşünün konkret tarixini söyləmək çətindir, lakin onun gələn həftə baş tutacağı ehtimalı azdır:

"Rusiya və ABŞ-dan ibarət ayrı-ayrı danışıqlar qrupları Ukrayna ilə bağlı təmaslara başlayacaq. Ukrayna ilə bağlı ABŞ-la təmasların nə vaxt başlayacağına Rusiya prezidenti özü qərar verəcək".

12:11

Ər-Riyadda ABŞ və Rusiya nümayəndələri arasında danışıqlar başlayıb. Bu barədə Rusiya Xarici İşlər Nazirliyinin rəsmi nümayəndəsi Mariya Zaxarova telegram kanalında paylaşıb.

Fevralın 12-də Rusiya və ABŞ prezidentləri Vladimir Putin və Donald Tramp arasında təxminən bir saat yarım davam edən telefon danışığı olub. 

Bildirilib ki, liderlər Ukraynada hərbi əməliyyatların dayandırılmasının zəruriliyini müzakirə ediblər və münaqişənin həlli üçün dərhal danışıqlara başlamaq barədə razılığa gəliblər.