Prezident Sərdar Ayazı qəbul edib

Azərbaycan Prezidenti İlham Əliyev iyulun 7-də Pakistan Milli Assambleyasının sədri Sərdar Ayaz Sadiqin başçılıq etdiyi nümayəndə heyətini qəbul edib. Bu barədə Prezidentin mətbuat xidməti məlumat yayıb.

Görüşdə dövlət başçısı Azərbaycan ilə Pakistan arasında siyasi münasibətlərin yüksək səviyyədə olduğunu vurğulayıb, əlaqələrin qardaşlıq və qarşılıqlı dəstəyə əsaslandığını bildirib.

Prezident Əliyev bir neçə gün əvvəl Xankəndidə Pakistanın Baş naziri Məhəmməd Şahbaz Şəriflə keçirilmiş görüşü xatırladaraq, bu səfərin işğaldan azad edilmiş ərazilərə baş nazirin ilk səfəri olmadığını qeyd edib. O, həmçinin mayda Şahbaz Şərifin Laçına səfərini və Müstəqillik Günü münasibətilə keçirilən tədbirdə iştirakını vurğulayıb.

Tərəflər parlamentlərarası əməkdaşlığın, o cümlədən beynəlxalq təşkilatlar çərçivəsində birgə fəaliyyətin əhəmiyyətini qeyd ediblər.

Görüş zamanı iqtisadiyyat, ticarət, enerji, investisiyalar, nəqliyyat və turizm sahələrində əməkdaşlıq perspektivləri müzakirə olunub.

Sərdar Ayaz Sadiq səfərin iki ölkə arasında parlamentlərarası münasibətlərin gücləndirilməsi üçün imkan yaratdığını bildirib və İqtisadi Əməkdaşlıq Təşkilatının Xankəndidə keçirilmiş 17-ci Zirvə görüşünün uğurla təşkilinə görə Prezident Əliyevi təbrik edib.