Prezident: ABŞ-ın 907-ci düzəlişi ləğv edəcəyini gözləyirik

Azərbaycan ABŞ Konqresinin “ədalətsiz və bu gün üçün tamamilə absurd” sayılan 907-ci düzəlişi ləğv edəcəyini gözləyir. Bunu ölkə Prezidenti İlham Əliyev yerli televiziya kanallarına müsahibəsində deyib.

Azərbaycan Prezidenti İlham Əliyev bildirib ki, Donald Trump administrasiyasının hakimiyyətə gəlməsi ilə ABŞ–Azərbaycan münasibətlərində vəziyyət köklü şəkildə dəyişib.

Əliyev müsahibəsində “Azadlığa Dəstək Aktı”na 907-ci düzəlişin dayandırılması ilə bağlı suala cavabında deyib ki, Vaşinqtonla Bakı arasında münasibətlər artıq yeni mərhələyə yüksəlib.

Əliyev qeyd edib ki, hazırda Azərbaycan ərazisindən Ermənistana müxtəlif yüklər daşınır, yollar açıqdır və hətta Azərbaycanın neft məhsulları bu ölkəyə ixrac olunur. Onun sözlərinə görə, əgər düzəlişin formal əsaslandırılması blokada idisə, bu amil artıq mövcud deyil.

Prezident əlavə edib ki, Tramp administrasiyasının Konqres üzvlərini, xüsusilə Respublikaçılar Partiyasını bu düzəlişin tam ləğvinin zəruriliyinə inandıra biləcəyinə dair Bakının kifayət qədər əsasları var.

Gülnar Nazimqızı