ABŞ Azərbaycanla münasibətlərdə yeni səhifə açır - Vens

ABŞ Azərbaycanla münasibətlərdə yeni səhifə açmaq niyyətindədir.Bunu ABŞ-nin vitse-prezidenti Cey Di Vens Azərbaycan Prezidenti İlham Əliyevlə keçirdiyi birgə mətbuat konfransında deyib.

“Biz bu dostluğa görə minnətdarlığımızı bildirmək, eyni zamanda münasibətlərdə yeni fəsil açmaq üçün bu gün buradayıq. Düşünürəm ki, ABŞ Prezidenti Donald Trampın və Prezident İlham Əliyevin liderliyi ilə əlaqələr daha da möhkəm və uğurlu olacaq. Həmçinin qeyd etmək istəyirəm ki, həyat yoldaşlarımız arasında da münasibətlərin olmasından məmnunuq”, – Vens bildirib.

Vitse-prezident ABŞ Prezidentinin xoş arzularını Azərbaycan dövlət başçısına çatdırdığını deyib və əlavə edib ki, Vaşinqton üçün böyük əhəmiyyət daşımasına baxmayaraq, tərəfdaşlıq uzun müddət lazımi səviyyədə qiymətləndirilməyib.

“Birləşmiş Ştatlar və Azərbaycan arasında tərəfdaşlığın regionda daha çox sülh və firavanlıq yaradacağına inanıram. Bu, ABŞ işçiləri üçün bazarlara çıxışı genişləndirəcək və insanların münaqişə ilə deyil, ticarət yolu ilə qarşılıqlı əlaqədə olduğu daha yaxşı dünyanın qurulmasına töhfə verəcək”, – o qeyd edib.

Vens “Tramp marşrutu” adlandırdığı və Azərbaycanın əsas hissəsi ilə Naxçıvanı birləşdirəcək nəqliyyat xətti üzərindən uçan ilk şəxslərdən biri olduğunu bildirib.

“Ümid edirik ki, bu, iqtisadi əməkdaşlığın inkişafına, təbii ehtiyatlar və kritik minerallar sahəsində qarşılıqlı fəaliyyətə kömək edəcək, həmçinin Azərbaycanla Ermənistan arasında tarixi sülh sazişinin möhkəmlənməsinə yardım göstərəcək”, – vitse-prezident deyib.

O əlavə edib ki, münaqişə və müharibələrin qarşısını alan əsas amillərdən biri xalqlar arasında mədəni mübadilə, birgə fəaliyyət və qarşıdurma əvəzinə ümumi firavanlığın təşviqidir.