Latviya və BƏƏ liderləri İranın Azərbaycana PUA hücumunu pisləyiblər

Latviya Prezidenti Edqars Rinkeviçs Azərbaycan Prezidenti İlham Əliyevə telefonla zəng edərək İranın pilotsuz uçuş aparatları ilə Azərbaycan ərazisinə həyata keçirdiyi hücumu qətiyyətlə pisləyib.Bu barədə Azərbaycan Prezidentinin Mətbuat Xidməti məlumat yayıb.

Telefon danışığı zamanı Rinkeviçs baş vermiş hadisə ilə bağlı Azərbaycan dövləti və xalqı ilə həmrəy olduğunu bildirib, hücum nəticəsində yaralananların tezliklə sağalmasını arzulayıb.
Prezident İlham Əliyev göstərilən dəstəyə görə Latviya liderinə təşəkkür edib.

Söhbət zamanı tərəflər Azərbaycan-Latviya ikitərəfli münasibətlərinin hazırkı vəziyyəti, gələcək təmaslar və əməkdaşlığın perspektivləri barədə fikir mübadiləsi aparıblar.
Eyni zamanda, Birləşmiş Ərəb Əmirliklərinin Prezidenti Şeyx Məhəmməd bin Zayed Al Nəhyan da martın 5-də İlham Əliyevə telefonla zəng edib.

BƏƏ Prezidenti İranın pilotsuz uçuş aparatları ilə Azərbaycan ərazisinə hücumunu pisləyib və hadisə nəticəsində yaralananlara şəfa diləyib.
Şeyx Məhəmməd bin Zayed Al Nəhyan İranın BƏƏ-yə raket və pilotsuz uçuş aparatları ilə hücumları zamanı Azərbaycanın göstərdiyi dəstəyə görə Prezident İlham Əliyevə minnətdarlığını bir daha ifadə edib.

Prezident İlham Əliyev də öz növbəsində İranın BƏƏ-yə raket və pilotsuz uçuş aparatları ilə hücumlarını bir daha pisləyib və Azərbaycanın BƏƏ ilə həmrəy olduğunu vurğulayıb.

Telefon danışığı zamanı tərəflər qarşılıqlı maraq doğuran digər məsələlər ətrafında da fikir mübadiləsi aparıblar.