Bayramov: Azərbaycan regionda “orta güc”ə çevrilib

Prezident İlham Əliyevin rəhbərliyi ilə həyata keçirilən siyasət nəticəsində Azərbaycan regionda geosiyasi mövqeyini gücləndirərək “orta güc” statusu qazanıb. Bunu Milli Məclisin deputatı Vüqar Bayramov bildirib. 

Deputat parlamentdə çıxışı zamanı qeyd edib ki, Azərbaycanın ərazi bütövlüyü və suverenliyini tam bərpa etməsi ölkənin regional və beynəlxalq mövqeyini möhkəmləndirib.

Onun sözlərinə görə, Azərbaycan MDB məkanında münaqişədən sonra ərazi bütövlüyünü tam təmin edən ilk dövlət olub.

Bayramov bildirib ki, ölkənin valyuta ehtiyatları 88 milyard dolları ötür və bu göstərici üzrə Azərbaycan dünyada yüksək mövqelərdən birini tutur. O əlavə edib ki, xarici borcun ÜDM-də payının 6,5% olması ölkəni ən aşağı borclu dövlətlər sırasına daxil edir.

Deputatın sözlərinə görə, Azərbaycanın ümumi daxili məhsulu 76 milyard dollara yaxınlaşaraq ölkəni Cənubi Qafqaz iqtisadiyyatının əsas hərəkətverici qüvvəsinə çevirib.

Deputat həmçinin qeyd edib ki, Azərbaycan son dörd ildə Avropaya 57 milyard kubmetrdən çox qaz ixrac edərək 16 ölkənin enerji təhlükəsizliyinə töhfə verib.

Gülnar Nazimqızı