İlham Əliyev: Avropa Parlamenti rüşvətxorlar yuvasıdır

Prezident İlham Əliyev Avropa Parlamentini sərt tənqid edərək qurumu “rüşvətxorlar yuvası” adlandırıb.

Dövlət başçısı bu barədə sentyabrın 15-də Türk Dövlətləri Təşkilatının Baş katibi Kubanıçbek Ömüralıyevi, TDT-nin Müsəlman Dini İdarə Rəhbərləri Şurasının üzvləri və müşahidəçilərini, Yəhya Bakuvi Beynəlxalq Konfransının həmtəşkilatçılarını və Qafqaz Xalqları Ali Dini Şurasının nümayəndə heyətini qəbul edərkən danışıb.

İlham Əliyev bildirib ki, Avropa Parlamentinin Ermənistanın Azərbaycana qarşı işğal siyasətinə münasibəti ikili standartların göstəricisidir.

“Avropa Parlamenti işğalçı Ermənistana hər zaman dəstək verib və bu gün də bu belədir”, - prezident deyib.

O qeyd edib ki, Ermənistanın Azərbaycan ərazilərini işğal etməsinə və yüz minlərlə azərbaycanlının öz torpaqlarından qovulmasına baxmayaraq, həmin dövrdə Ermənistana qarşı beynəlxalq sanksiyalar tətbiq edilməyib.

Prezident bildirib ki, Azərbaycan 2023-cü ilin sentyabrında Qarabağda separatçılığa son qoyduqdan dörd ay sonra Avropa Şurası Azərbaycana qarşı sanksiya tətbiq edib.

“Bax, onların əsl siması budur. Avropa Parlamenti rüşvətxorlar yuvasıdır. Bunu mən tam məsuliyyətlə deyirəm - rüşvətxorlar yuvasıdır Avropa Parlamenti”, - İlham Əliyev vurğulayıb.

O, həmçinin Avropa Parlamentinin keçmiş vitse-prezidenti Eva Kaylinin korrupsiya işi üzrə saxlanılmasına işarə edərək, qurumda bu məsələyə görə lazımi tədbirlərin görülmədiyini bildirib.

Prezident Avropa Parlamentində islamofob yanaşmaların olduğunu da qeyd edib və bu məsələnin diqqətdə saxlanılmasının vacibliyini vurğulayıb.