Məlumat verənləri sıxışdırıb işdən çıxara bilərlər - deputat qanunun əlehinə səs verəcəyini deyir

Deputat Erkin Qədirli korrupsiya ilə bağlı məlumat verən şəxslərin həvəsləndirilməsi və müdafiəsi haqqında qanun layihəsinin əleyhinə səs verəcəyini açıqlayıb.

O, məlumat verən şəxslərin təzyiqə məruz qala, işdən çıxarıla və karyeralarında problemlərlə üzləşə biləcəyindən narahatdır.

“Başqa ölkələrin təcrübəsi də göstərir ki, bu, ağır nəticələrə gətirə bilər. Məlumat verən insanları sıxışdırır, qısnayır, işdən çıxarırlar”, - Qədirli anews.az-a açıqlamasında deyib.

Deputat sovet dövründə “donosçuluq” anlayışının yaratdığı ağır nəticələri də xatırladıb.

“Bəlkə yanılıram, amma mən bu fikirdəyəm”, ' o əlavə edib.

Layihəyə əsasən, korrupsiya barədə məlumatı təsdiqlənən şəxsə təşkilatın büdcəsi hesabına minimum əməkhaqqının 25 mislinədək mükafat verilə bilər.

Müəyyən hallarda dövlətə ödənilmiş maddi ziyanın 5 faizinin də məlumat verən şəxsə verilməsi nəzərdə tutulur. Mükafatın məbləği hüquqpozmanın xarakteri, məlumatın əhəmiyyəti, vurulmuş zərər və bərpa edilmiş aktivlər nəzərə alınmaqla müəyyən ediləcək.

Layihədə məlumat verənin kimliyinin məxfiliyinin qorunması, iş yerində qisas tədbirlərinin və təzyiqin qadağan edilməsi, eləcə də hüquqi yardım almaq imkanları yer alır.

Məlumatın, bir qayda olaraq, 20 iş günü ərzində araşdırılması, əlavə materiallara ehtiyac yaranarsa müddətin daha 10 iş günü uzadılması təklif olunur.

Gülnar Nazimqızı