Azərbaycan Qran-prisi üçün marşal qeydiyyatı başa çatdı

Bakı Şəhər Halqası Əməliyyat Şirkətinin (BŞH) tərkibində fəaliyyət göstərən Bakı Marşal Klubu (BMK) "Formula 1" üzrə Azərbaycan Qran Prisi üçün marşal qeydiyyat proqramını başa vurub.
 
BŞH-dan verilən məlumata görə, yanvarın 10-dan etibarən başlayan seçimlərdə 3000-ə yaxın şəxs qeydiyyatdan keçib.
 
Müsahibə mərhələsi isə fevralın 20-də yekunlaşıb. Artıq 440-a yaxın namizəd müsahibə mərhələsinə qatılıb. Müraciətlər arasında yerli namizədlərin sayi 2300-ə çatıb, onlardan 950-si əvvəlki yarışlarda iştirak etmiş marşallardır. Xarici ölkələrdən 360 müraciət daxil olub.
 
Martdan etibarən marşalların təlimlərinə start veriləcək. Təlimlər hər şənbə və bazar günləri Avropa Oyunları Parkında yerləşən Marşal tədris-təlim mərkəzində baş tutacaq. Bu prosesin iyunadək davam etməsi nəzərdə tutulur.
 
Azərbaycan Qran-prisi üçün marşal fəaliyyətini uğurla başa çatdırmış şəxslərə Azərbaycan Avtomobil Federasiyası və Beynəlxalq Avtomobil Federasiyasının (FIA) beynəlxalq lisenziyası təqdim olunacaq. Beynəlxalq lisenziya marşallara, yalnız Azərbaycanda deyil, həmçinin "Formula 1" Qran-prisinə ev sahibliyi edən digər ölkələrdə keçiriləcək yarışlara qatılmaq hüququ verəcək.
 
"Formula 1" mövsümünə martın 20-də Bəhreyndə start veriləcək. 10 - 12 iyunda Bakıda Azərbaycan Qran-prisi təşkil olunacaq.

www.anews.az