Aİ ölkələrindən Rusiyaya qarşı ƏLAVƏ SANKSİYALAR

Aİ ölkələrinin liderləri keçirdikləri sammitdə Rusiyaya qarşı əlavə sanksiyaların tətbiqi ilə bağlı razılığa gəliblər, bu barədə xarici media məlumat yayıb. 

Sammit zamanı iştirakçılar qərara gəliblər ki, Rusiyaya qarşı sanksiyalar viza siyasətini də əhatə etsin. Bundan əlavə, sanksiya siyahılarında yeni adlar və təşkilatların adları yer alacaq.

"Avropa İttifaqı Şurası bu gün tərəfdaşlarımız və müttəfiqlərimizlə sıx koordinasiyada Rusiya üçün öz hərəkətləri üçün kütləvi və ciddi nəticələrə səbəb olacaq əlavə məhdudlaşdırıcı tədbirlər haqqında razılığa gəldi. Bu sanksiyalar maliyyə sektorunu, energetika və nəqliyyat sektorlarını, ikili təyinatlı malları, o cümlədən ixraca nəzarət və ixracın maliyyələşdirilməsini, viza siyasətini, əlavə Rusiyanın fiziki şəxslərinin (məhdudiyyətlər - red.) siyahılarına daxil edilməsini əhatə edir”, - Avropa İttifaqı Şurasının Prezidenti Şarl Mişel özünün tviterdəki hesabında sammitin yekunlarına dair yazıb.

Ukrayna münaqişəsinə dair fövqəladə sammitin yekunlarına və Rusiyaya qarşı yeni sanksiyalar paketinin razılaşdırılmasına əsasən, Avropa İttifaqı Ukraynaya dəstəyi gücləndirməyə və beynəlxalq donorlar konfransı keçirməyə hazırdır.

Rusiya fevralın 24-də Ukrayna ərazisində hərbi əməliyyata başlayıb. Əməliyyatlar zamanı Çernobıl Atom Elektrik Stansiyası, Qostomel hava limanı, Xerson şəhərləri ələ keçirilib, bir sıra obyektlərə hava zərbələri endirilib.