Ceyhun Bayramov Sloveniyanın xarici işlər naziri ilə görüşüb

Azərbaycanın xarici işlər naziri Ceyhun Bayramov BMT Baş Assambleyasının 81-ci sessiyası çərçivəsində Sloveniyanın xarici və Avropa işləri naziri Tone Kajzerlə görüşüb.Bu barədə Azərbaycan Xarici İşlər Nazirliyi məlumat yayıb.

Bayramov həmkarını vəzifəyə təyin olunması münasibətilə təbrik edib və fəaliyyətində uğurlar arzulayıb.

Görüşdə Azərbaycan-Sloveniya münasibətlərinin gündəliyi nəzərdən keçirilib. Bu il iki ölkə arasında diplomatik münasibətlərin qurulmasının 30 illiyinin qeyd olunduğu vurğulanıb və siyasi dialoqun intensivləşdirilməsi, eləcə də beynəlxalq platformalarda qarşılıqlı dəstəyin gücləndirilməsinin vacibliyi qeyd olunub.

Nazirlər enerji və tranzit sahələrində əməkdaşlığın genişləndirilməsi imkanlarını müzakirə ediblər. Azərbaycan təbii qazının Sloveniya bazarına tədarükü müsbət qiymətləndirilib, həmçinin Orta Dəhliz boyunca strateji bağlantı üzrə tərəfdaşlıqların inkişaf etdirilməsi imkanları nəzərdən keçirilib.

Bayramov, həmçinin Azərbaycan-Ermənistan normallaşma gündəliyinin hazırkı vəziyyəti və Azərbaycanın işğaldan azad edilmiş ərazilərində aparılan genişmiqyaslı yenidənqurma işləri barədə məlumat verib.