Bp dekarbonizasiyaya dair təklif və tövsiyələrini Azərbaycana təqdim edib

27.05.2022 15:16

Azərbaycanın bərpa olunan enerji mənbələri üzrə potensialı, az karbonlu həll imkanları, innovativ bərpa olunan enerji layihələri, habelə bp-nin dəstək ola biləcəyi layihələrdən bəhs edən Bp Azərbaycanın dekarbonizasiyaya dair təklif və tövsiyələri Energetika Nazirliyinə təqdim edilib. Bu barədə Bp-Azərbaycan məlumat verir.

Karbonsuzlaşdırma strateji aspektdə əsaslandırılaraq bu prosesin 2050-ci ilə qədər olan müddətdə Azərbaycan üçün mümkün nəticələri təqdim edilir.

"Bu sənədin hazırlanması və bugünkü təqdimat ölkənin enerji keçidi səylərinə dəstək olaraq bp-nin Azərbaycan hökuməti ilə əməkdaşlığında irəliyə doğru atılmış önəmli bir addımdır. Ötən ilki memorandumun imzalanmasından bəri biz ciddi işləyərək bp Qrupunda tətbiq olunan az karbonlu texnologiyalar və biznes modelləri təcrübəsindən istifadə etməklə Azərbaycan üçün bu sənədi hazırlamışıq. Çox məmnunuq ki, artıq bu sənədin bir sıra komponentləri üzərində iş gedir. Ümid edirik ki, bp istər karbohidrogenlər, istərsə də az karbonlu enerji sahəsində Azərbaycanın enerji ehtiyatlarının işləniməsinə yardım etməkdə aparıcı rol oynamağa davam edəcək”, bp-nin Azərbaycan, Gürcüstan və Türkiyə üzrə regional prezidenti Qarri Cons bildirib.

Bu sənəd iri miqyasda karbonsuzlaşdırılmış, inteqrasiya edilmiş enerji və nəqliyyat sistemləri, o cümlədən Azərbaycanın şəhər və rayonlarında bərpa olunan enerji layihələri üçün tələb edilən potensialın və şəraitin qiymətləndirilməsi üzrə əməkdaşlıq etmək məqsədilə 2021-ci ilin fevralında Energetika Nazirliyi ilə bp şirkəti arasında imzalanmış Anlaşma Memorandumuna əsaslanır.

Həmin vaxtdan etibarən bp və Energetika Nazirliyi, həmçinin müxtəlif dövlət qurumları bu sənədin hazırlanması istiqamətində fəal əməkdaşlığa cəlb edilib. Ölkə üçün müxtəlif dekarbonizasiya imkanlarının intensiv müzakirəsi əsasında bu sənəd tərtib olunub.

Bp və Energetika Nazirliyi Azərbaycanın az karbonlu enerji ehtiyatlarının işlənməsi üzrə vizyonunun reallaşdırılması və ölkənin ümumi dayanıqlı inkişaf məqsədlərinin həyata keçirilməsi istiqamətində sıx əməkdaşlıq etməkdə davam edəcək.

Bp həmçinin Azərbaycanın işğaldan azad edilmiş rayonlarında günəş elektrik stansiyalarını quraşdırmaq niyyətindədir.

Böyük Britaniyanın neft nəhəngi olan Bp Azərbaycanda ən iri neft-qaz layihələrinə operatorluq edir.

N.Təbrizli

www.anews.az

Xəbəri bəyəndiniz?

Sosial şəbəkələrdə paylaş