Ermənistan artıq Azərbaycana sülh sazişi layihəsi göndərib- PAŞİNYAN

"Ermənistan Azərbaycanla sülhün və münasibətlərin qurulmasına dair saziş layihəsi üzərində işi başa çatdırıb və bizim təkliflərimiz Azərbaycan tərəfinə verilib. Biz onları ATƏT-in Minsk Qrupu ölkələrinə də təqdim etmişik", - baş nazir bildirib. 

 

Azərbaycan Xarici İşlər Nazirliyindən məsələyə şərh bildirilmədi.

 

Çərşənbə günü Azərbaycanın xarici işlər naziri Ceyhun Bayramov Avropa İttifaqının Şərq Tərəfdaşlığı Proqramı üzrə səfiri Kristina Yohannessonla telefonla danışığında bildirib ki, Ermənistan sülh prosesinə və sülh sazişi üzrə danışıqlara maneələr yaradır. 

 

Azərbaycan Xarici İşlər Nazirliyi bəyan edib ki, Bakı danışıqların sürətlə aparılmasının tərəfdarıdır və hər zaman onlara hazırdır.

Rusiyanın xarici işlər naziri Sergey Lavrov azərbaycanlı həmkarı Ceyhun Bayramovla danışıqlardan sonra Rusiya Federasiyasının Azərbaycan və Ermənistan XİN rəhbərləri arasında sülh müqaviləsi layihəsi üzrə danışıqları təşkil etməyə hazır olduğunu söyləyib.

Rusiya, Ermənistan və Azərbaycan xarici işlər nazirlərinin əvvəlki görüşü 2022-ci ilin oktyabrında Astanada baş tutub.

Gülnar Nazimqızı