Bu regionda sülhə mənfi təsir göstərir - deputat

Avropa Parlamentinin son qətnamələri Azərbaycana qarşı qərəzli yanaşmanı əks etdirir və regionda sülh prosesinə mənfi təsir göstərir. Bunu deputat Zahid Oruc deyib. 

Onun sözlərinə görə, Azərbaycan müharibədə əldə etdiyi qələbədən sonra Avropa Parlamenti “məğlub tərəfin tribunasına çevrilərək” ölkəyə qarşı ittihamların intensivliyini artırıb.

Oruc qeyd edib ki, sənədlərdə mədəni irs, qayıdış və digər məsələlər adı altında Azərbaycana qarşı tənqidi yanaşma sərgilənir. Deputat həmçinin bildirib ki, bəzi hallarda keçmiş münaqişə iştirakçılarının “hərbi əsir” kimi təqdim olunması cəhdləri müşahidə olunur.

Deputat əlavə edib ki, qətnamələrdə istifadə olunan terminologiya və yanaşmalar Ermənistanın rəsmi mövqeyi ilə tam üst-üstə düşmür və bu, xarici təsirlərin mövcudluğuna işarə edir.

Onun sözlərinə görə, sənəddə Ermənistanın “demokratik dayanıqlığının gücləndirilməsi” və xarici təsirlərdən qorunması kimi təqdim olunan məqsədlər əslində regionda normallaşma prosesinə mane ola bilər.

Deputat bildirib ki, Azərbaycan və Ermənistan arasında sülh prosesinin irəlilədiyi bir dövrdə bu cür addımlar barış səylərinə zərbə vurur. O, yaxın perspektivdə sülh müqaviləsinin imzalanacağı təqdirdə bu qətnamələrin “tarixdə qalacağını” qeyd edib.

Deputat hesab edir ki, regionda sabitliyin təmin olunması üçün tərəflər sülh prosesini dəstəkləməli və xarici təsirlərə qarşı birgə mövqe nümayiş etdirməlidirlər.

Gülnar Nazimqızı