Nurullayev: Avropa Parlamenti Azərbaycana qeyri-obyektiv yanaşır

 Avropa Parlamenti tərəfindən Azərbaycana dair qəbul edilən qətnamələr hüquqi və obyektivlik baxımından problemlidir. Bunu deputat Razi Murullayev deyib. 

Onun sözlərinə görə, bu yanaşmalar “selektiv və qeyri-obyektiv” xarakter daşıyır və regionun reallıqlarını tam əks etdirmir.

“Azərbaycan müstəqil və suveren dövlətdir və öz daxili işlərini beynəlxalq hüquq çərçivəsində tənzimləmək hüququna malikdir”, -  deputat qeyd edib.

Nurullayev bildirib ki, Avropa Parlamenti qərar qəbul edərkən birtərəfli məlumatlara əsaslanır və bu, qarşılıqlı etimadın formalaşmasına mane olur.

Deputat həmçinin sual edib ki, niyə oxşar həssaslıq digər regionlarda baş verən hadisələrə münasibətdə göstərilmir və bu kontekstdə ikili standartların tətbiq olunduğunu vurğulayıb.

O əlavə edib ki, Azərbaycan Avropa İttifaqı ilə enerji təhlükəsizliyi, regional sabitlik və iqtisadi əməkdaşlıq sahələrində mühüm tərəfdaşdır və son illərdə bu rolu daha da artıb.

Nurullayev qeyd edib ki, Azərbaycan konstruktiv dialoq tərəfdarıdır və əsaslandırılmış tənqidə açıqdır, lakin tənqid obyektiv və balanslı olmalıdır.

Deputat Avropa Parlamentini daha məsuliyyətli və ədalətli mövqe tutmağa çağıraraq bildirib ki, əks halda bu yanaşma həm münasibətlərə, həm də regionda sabitliyə mənfi təsir göstərə bilər.

Gülnar Nazimqızı