Azərbaycan qaz ixracını 8 mlrd kubmetr artıracaq - İlham Əliyev

Enerji sektoru Azərbaycanın ÜDM-də 30 faizdən çox paya malikdir.  Bu barədə Prezident İlham Əliyev Bakı Enerji Həftəsində bildirib.

“Azərbaycan sabit siyasi sistemə və inkişaf edən iqtisadiyyata malik ölkədir. Xarici borcumuz ÜDM-in 7 faizindən azdır, maliyyə ehtiyatlarımız isə xarici borcu 14 dəfə üstələyir”, — dövlət başçısı vurğulayıb.

Prezident bildirib ki, yoxsulluq səviyyəsi 5 faizə endirilib, təhsilə böyük sərmayələr qoyulub və savadlılıq səviyyəsi 100 faizə yaxındır. Azərbaycanın dənizə çıxışı olmasa da, ölkə regionun əsas nəqliyyat qovşaqlarından birinə çevrilib və infrastruktur layihələrinə iri yatırımlar edilib.

Əliyev vurğulayıb ki, ölkənin enerji layihələri Avrasiyanın enerji xəritəsini dəyişib. 

“Biz Xəzər dənizini Qara dəniz və Aralıq dənizi ilə birləşdirən strateji boru kəmərləri inşa etdik. Boru kəmərlərimizin tacı olan Cənub Qaz Dəhlizi 3,500 kilometr uzunluğunda olub Azərbaycanın dəniz yataqlarını İtaliya ilə birləşdirir”, — Prezident qeyd edib.

O əlavə edib ki, Azərbaycan təbii qaz ixracını genişləndirir və hazırda qaz səkkiz deyil, artıq 12 ölkəyə ixrac olunur.
 “Bu son deyil”, — deyən Əliyev yeni ölkələrlə danışıqların və sərmayələrin davam etdiyini vurğulayıb.

Ötən il Azərbaycanın qaz ixracı 25 milyard kubmetrə çatıb. Prezidentin sözlərinə görə, 2030-cu ilə qədər ixrac həcmi əlavə 8 milyard kubmetr artırılacaq. 

Eyni dövrdə Azərbaycanın bərpa olunan enerji üzrə quraşdırılan gücü 6.5 gigavatta çatdırılacaq.

“Biz enerji ehtiyatlarını düzgün idarə etdikdə və investorlar, tranzit ölkələri və istehlakçılar arasında maraqlar balansına diqqət yetirdikdə uğur əldə edirik”, —  Əliyev əlavə edib.

N.Təbrizli