Saytlara girişlə bağlı yaranmış texniki nasazlığın səbəbi bilindi - "Cloudflare"dən növbəti AÇIQLAMA - YENİLƏNİB

ABŞ-nin "Cloudflare" bulud servisində baş vermiş miqyaslı texniki nasazlığın səbəbi təhlükəli trafiki idarə etmək üçün avtomatik yaradılan konfiqurasiya faylı olub.Bu barədə "Kommersant" nəşrinə servisin Mətbuat Xidmətindən məlumat veriblər.

Məlumata görə, nasazlıq konfiqurasiya faylının gözlənilən ölçüdən böyük olması səbəbindən yaranıb, bu da "Cloudflare"in bir sıra xidmətlərinin trafikini emal edən proqram təminatının işində xətaya gətirib çıxarıb.

19:20

Azərbaycanın və bir çox dünya ölkələrinin bəzi saytlarına girişlə bağlı yaranan problemlər aradan qaldırılıb.Bu barədə "Cloudflare" açıqlama yayıb.

Bildirilib ki, texniki insident həll edilib.

Hazırda xidmət bütün servislərin normal iş rejiminə tam qayıtdığından əmin olmaq üçün onların işini yaxından izləyir.

***

Bu gün Cloudflare-in qlobal infrastrukturu üzrə genişmiqyaslı nasazlıq qeydə alınıb.

Cloudflare xidmətlərində yaranan problem səbəbindən dünyanın müxtəlif regionlarında çoxsaylı saytlar açılmır və istifadəçilərə “Cloudflare Error” tipli xətalar təqdim olunur.

Cloudflare üzərindən çalışan bir çox Azərbaycan saytları da eyni səbəbdən əlçatan deyil. Saytların özündə və ya serverlərində texniki nasazlıq yoxdur – resurslar yalnız trafikin Cloudflare şəbəkəsindən keçməməsi səbəbindən müvəqqəti olaraq əlçatmaz görünür.

Şirkət qlobal miqyaslı kəsintini aradan qaldırmaq üzərində işlədiyini açıqlayıb. Problemin qısa müddətdə bərpa olunacağı gözlənilir.