Litva sabahdan Belarusla sərhədi açır

Litva hökuməti Belarusla sərhəddə oktyabrın sonundan bəri müvəqqəti bağlanan iki keçid məntəqəsinin vaxtından əvvəl açılması barədə qərar qəbul edib.

Bu barədə Litva mediası məlumat yayıb.

Söhbət “Medyininkay” (qarşı tərəfdə “Kamenniy Loq”) və “Şalçinininkay” (qarşı tərəfdə “Benakonı”) sərhəd-keçid məntəqələrindən gedir. Hər iki məntəqə sabah — 20 noyabr tarixindən etibarən fəaliyyətini bərpa edəcək.

Litvanın daxili işlər naziri Vladislav Kondratoviç hökumət iclasında bildirib ki, Milli Təhlükəsizlik Komissiyasının qəbul etdiyi qərarlar mövcud şəraitin dəyişdiyini göstərir.

“29 oktyabr 2025-ci ildə tətbiq edilən sərhədi keçmə məhdudiyyətlərinin artıq daxili təhlükəsizliyin təmin olunması üçün zəruri olmadığı müəyyən edilib. Bu səbəbdən həmin məhdudiyyətlərin ləğvi məqsədəuyğundur”, - daxili işlər naziri bildirib.

Bundan əvvəl Litvanın Baş naziri İnqa Ruqinene açıqlayıb ki, Milli Təhlükəsizlik Komissiyası bu iki keçid məntəqəsinin açılmasını tövsiyə edib. Onun sözlərinə görə, sərhədin fəaliyyətə hazırlanması bir gün vaxt tələb edir.