ABŞ kəşfiyyat rəhbəri tərəfindən yaradılan qrupun fəaliyyəti dayandırılıb

ABŞ Milli Kəşfiyyatının direktoru Tulsi Qabbard ötən il yaratdığı Direktorun Təşəbbüslər Qrupunun (DIG) fəaliyyətinin dayandırıldığını açıqlayıb. Bu barədə o Reuters agentliyinə müsahibəsində deyib.

Qabbard qeyd edib ki, qrup əvvəlcə kəşfiyyat agentliklərinin siyasiləşdirilməsinin qarşısını almaq və prezidentin sərəncamlarının icrası da daxil olmaqla yüksək prioritetli, qısamüddətli layihələri həyata keçirmək üçün müvəqqəti təşəbbüs kimi yaradılıb.

Onun sözlərinə görə, DIG üzvləri hazırda Milli Kəşfiyyat İdarəsinin digər struktur bölmələrinə inteqrasiya olunub.

“Direktorun Təşəbbüslər Qrupu prezidentin sərəncamlarının icrası da daxil olmaqla, yüksək prioritetli, qısamüddətli layihələri dəstəkləmək üçün resurslar təmin etmək məqsədilə müvəqqəti təşəbbüs kimi yaradılıb,” – Qabbard bildirib.

“Qrupa müvəqqəti olaraq təyin olunmuş mütəxəssislərin təcrübə və bacarıqlarından istifadə etməklə və onları müxtəlif komandalarımıza inteqrasiya etməklə nəticələr əldə etməyə davam edirik",- o əlavə edib. 

Bununla belə, Qabbardın əleyhdarları DIG-i tənqid edərək onun Donald Trump administrasiyasının qərəzli siyasi gündəliyinə xidmət etdiyini iddia ediblər.
Reuters-ə danışan iki mənbə qrupun buraxdığı səhvlər səbəbindən dağıldığını bildirib. Lakin Qabbardın ofisinin sözçüsü qanun pozuntusu ilə bağlı iddiaları qəti şəkildə rədd edib və qurumun əvvəlcədən müvəqqəti xarakter daşıdığını vurğulayıb.
DIG-in bağlanması ABŞ kəşfiyyat sistemində struktur dəyişiklikləri və siyasi təsir məsələləri ilə bağlı müzakirələri yenidən gündəmə gətirib.

Gülnar