Bolqarıstanda növbədənkənar parlament seçkiləri aprelin 19-da keçiriləcək

Bolqarıstan-da növbədənkənar parlament seçkiləri aprelin 19-da keçiriləcək. Bu barədə ölkə Prezidenti İliana Yotova bildirib.

Reuters-in məlumatına görə, prezident ötən həftə Bolqarıstan Milli Bankının sədr müavini Andrey Qyurov-u müvəqqəti hökumətin rəhbəri təyin edib. Yeni kabinet Aİ və NATO üzvü olan ölkədə son beş ildə səkkizinci parlament seçkilərinə hazırlıq aparacaq.

Əvvəlki hökumət iqtisadi siyasətə qarşı həftələrlə davam edən etirazlardan və korrupsiyaya qarşı mübarizədə uğursuzluq ittihamlarından sonra istefaya göndərilib.

Prezident Yotova müvəqqəti hökumətin üzvlərinin təqdimatından sonra mətbuat konfransında bildirib ki, seçkilərin keçirilməsi ilə bağlı fərmanı imzalayacaq.

Yanvarın 1-də avro zonasına qoşulan Bolqarıstan uzun müddətdir siyasi qeyri-sabitlik yaşayır və parçalanmış parlamentdə sabit hakim koalisiya formalaşdırmaq çətin olaraq qalır.

Aytac