Yerevanda atışma: bir nəfər ölüb, bir neçə yaralı var

Fevralın 18-də Yerevan şəhərinin Ajapnyak rayonu ərazisində baş verən atışma nəticəsində bir nəfər ölüb, bir neçə nəfər yaralanıb.

NEWS.am-ın məlumatına görə, hadisə ilə bağlı xəstəxanaya aparılan 7 nəfərdən biri həyatını itirib, ikisinin vəziyyəti ağırdır, digərlərinin vəziyyəti stabildir. Bu barədə cərrahiyyə üzrə müavin Aşot Kurqinyan bildirib. Onun sözlərinə görə, yaralananlardan bəzilərinin həyatı təhlükədə ola bilər.

Daha əvvəl Ajapnyak rayonunda silah səslərinin eşidildiyi, internetdə bir qrup şəxsin bir-birinə atəş açdığını əks etdirən görüntülərin yayıldığı bildirilib. Hadisə yerində güllə gilizləri, bıçaq və güllə izləri olan avtomobil aşkar edilib.

Hüquq-mühafizə orqanları yaralıların və avtomobil sahibinin şəxsiyyətini müəyyənləşdirir. Polis rəhbərliyi, o cümlədən Kamo Tsutsulyan hadisə yerindədir.

Ermənistan Daxili İşlər Nazirliyi hadisənin bütün hallarının araşdırıldığını və əməliyyat-istintaq tədbirlərinin davam etdiyini bildirib.