Meksikada kartel liderinin öldürülməsi kütləvi iğtişaşlara səbəb olub

Meksikanın ən böyük cinayətkar qruplaşmalarından biri olan “Xalisko Yeni Nəsil” kartelinin lideri, "El Menço" ləqəbli Nemesio Oseguera Servantes hərbi əməliyyat nəticəsində öldürülüb. Bu barədə yerli KİV xəbər verir.

Liderin ölümü ilə bağlı xəbərlərdən sonra kartel üzvləri ölkənin müxtəlif ştatlarında, o cümlədən avtomobil yollarını bağlamaq, nəqliyyat vasitələrini və kommersiya obyektlərini yandırmaqla kütləvi narazılıq və təxribatlara başlayıblar.

Yerli hakimiyyət həmin ərazilərdə təhlükəsizlik qüvvələrinin fəaliyyətini gücləndirib və sakinlərə evdə qalmağı tövsiyə edib.

Servantes “El Çapo” ləqəbli Xoakin Qusmanın həbsindən sonra Meksikada ən təhlükəli və çox axtarılan narkobaron hesab olunurdu. CJNG ölkənin bir çox ştatında narkotik ticarətini idarə edir və beynəlxalq narkotik marşrutlarında mühüm rol oynayır.