Əraqçi və Lavrov arasında telefon danışığı olub

Rusiya və İran xarici işlər nazirləri arasında telefon danışığı baş tutub.Bu barədə Rusiya XİN-in teleqram kanalında məlumat verilib.

Lavrov və Əraqçi arasında söhbət Tehranın təşəbbüsü ilə reallaşıb.

Danışıq zamanı Əraqçi İran rəhbərliyinin nüvə sazişi üzrə danışıqları pozan Amerika-İsrail hücumuna qarşı atdığı addımlar barədə həmkarını məlumatlandırıb. O, həmçinin Tehranın BMT Təhlükəsizlik Şurasının təcili iclasını çağırmaq planlarını açıqlayıb.

Lavrov İslam Respublikasına qarşı həyata keçirilən bu addımı “səbəbsiz silahlı hücum” adlandıraraq pisləyib. Rusiyalı nazir hücumun beynəlxalq hüququn pozulması olduğunu və regional, eləcə də qlobal təhlükəsizlik üçün ciddi fəsadlar törədəcəyini qeyd edib. O, İrana qarşı təcavüzün dərhal dayandırılmasına çağırıb və Moskvanın münaqişənin dinc yolla həlli üçün vasitəçilik etməyə hazır olduğunu bildirib.