İranda hərbi əməliyyatlar bütün məqsədlərə çatana qədər davam edəcək - Tramp

İrana qarşı hərbi əməliyyatlar davam edir və ABŞ bütün məqsədlərinə çatana qədər dayanmayacaq. Bunu ABŞ prezidenti Donald Trump bildirib.

Truth Social platformasında yayımlanan videoda Tramp üç amerikalı hərbçinin öldüyünü təsdiqləyib və itkilərin arta biləcəyini bildirib. O, ABŞ vətəndaşlarının ölümünün qisasını alacaqlarını deyib.

Tramp qeyd edib ki, döyüş əməliyyatları “tam güclə” davam edir və Vaşinqtonun “çox güclü məqsədləri” var. NBC telekanalına müsahibəsində isə əməliyyatın nəticəsinin bütün dünya üçün böyük əhəmiyyət daşıyacağını bildirib.

ABŞ prezidentinin sözlərinə görə, İran rəsmiləri Vaşinqtonla danışıqlar aparmaq istəyir, lakin o, konkret adlar və ya müzakirə mövzularını açıqlamayıb. Zərbələrin danışıqlar zamanı dayandırılıb-dayandırılmayacağı ilə bağlı suala cavabında Tramp bunun mümkünlüyünü istisna etməyib, lakin Tehranın ABŞ-ı qane edib-etmədiyini hələ qiymətləndirmədiyini deyib.

O əlavə edib ki, əməliyyatların başlanmasının səbəbi İranın nüvə tədqiqatlarını dayandırmaq və nüvə silahına sahib olmayacağını bəyan etmək istəməməsi olub. Tramp həmçinin İran ordusunu silahlarını yerə qoymağa çağırıb.

Gülnar