“Azeri Light” nefti 6,8% bahalaşaraq 87,9 dollara yüksəlib

Dünya bazarında Azərbaycanın “Azeri Light” markalı neftinin qiyməti artıb. Bir barelin qiyməti 5,61 ABŞ dolları və ya 6,82 % yüksələrək 87,90 ABŞ dolları təşkil edib.

Hərracların nəticələrinə görə, “Brent” markalı neftin may fyuçersləri 87,71 ABŞ dolları səviyyəsində formalaşıb.

Türkiyənin Ceyhan limanında FOB bazasında “Azeri Light” markalı neftin qiyməti 5,34 ABŞ dolları və ya 6,82 % artaraq 83,69 ABŞ dollarına çatıb.

Azərbaycanın 2026-cı il dövlət büdcəsində bir barel neftin orta qiyməti 65 ABŞ dolları səviyyəsində götürülüb. Bu isə hazırkı qiymətin büdcə proqnozundan xeyli yüksək olduğunu göstərir.

Məlumat üçün bildirək ki, “Azeri Light” neftinin ən aşağı qiyməti 2020-ci il 21 aprel tarixində 15,81 dollar, ən yüksək qiyməti isə 2008-ci ilin iyulunda 149,66 dollar olub.

Azərbaycanda bu markalı neft “Azəri-Çıraq-Günəşli” (AÇG) yataqlar blokunun işlənməsi üzrə müqavilə çərçivəsində hasil edilir. Müqaviləyə əsasən Azərbaycan Dövlət Neft Şirkətinin (SOCAR) payı 31,65 % təşkil edir.