DİN:1392 uşaq sosial qiymətləndirməyə cəlb olunub

Azərbaycanda insan alveri və sosial risklərin qarşısının alınması məqsədilə uşaqlarla bağlı monitorinq və sosial müdafiə tədbirləri genişləndirilib. Bunu daxili işlər nazirinin müavini Seyfulla Əzimov bildirib.

Onun sözlərinə görə, sosial sifarişlər çərçivəsində uşaqlar üçün 30 erkən qayğı mərkəzi yaradılıb. “Təhsildə sosial iş” layihəsi çərçivəsində isə 1140 ümumi təhsil müəssisəsində monitorinqlər aparılıb.

Nazir müavini qeyd edib ki, risk faktorlarının aşkarlanması məqsədilə 1392 uşaq sosial qiymətləndirməyə cəlb olunub.

Əzimov əlavə edib ki, şəxsiyyət vəsiqəsi olmayan uşaqların qeydiyyata alınması istiqamətində hüquqi və profilaktik tədbirlər davam etdirilib. Hesabat dövründə 9 uşağın doğum faktı müəyyən olunub, məhkəmə qərarları əsasında onlara doğum haqqında şəhadətnamələr verilib və məlumatlar dövlət reyestrinə daxil edilərək fərdi identifikasiya nömrələri təqdim olunub.

Onun sözlərinə görə, hesabat dövründə insan alverinə qarşı mübarizə sahəsində təlim və ixtisasartırma proqramları da davam etdirilib. Hüquq-mühafizə, miqrasiya, ədliyyə, səhiyyə, turizm və diplomatik xidmət sahələrini əhatə edən proqramlarda 2000-dən çox iştirakçının peşə hazırlığı artırılıb.

Nazir müavini bildirib ki, 20 şəhər və rayon polis orqanının rəhbər heyəti, həmçinin 84 polis orqanının 1800-ə yaxın əməkdaşı insan alveri və məcburi əmək cinayətləri ilə bağlı xüsusi təlimlərə cəlb olunub.

Gülnar Nazimqızı