Perinatal Mərkəzdə 7 körpənin öldüyü yanğın işi üzrə sabiq direktor 7 il 3 ay həbs cəzası alıb

Bakı Ağır Cinayətlər Məhkəməsi Respublika Perinatal Mərkəzində 2024-cü ildə baş vermiş və yeddi yeni doğulmuş körpənin ölümü ilə nəticələnən yanğınla bağlı cinayət işi üzrə mərkəzin sabiq direktoru Mehriban Abasquliyeva barəsində 7 il 3 ay müddətinə azadlıqdan məhrumetmə cəzası təyin edib.

Yerli medianın məlumatına görə, hökm hakim Leyla Əsgərova-Məmmədova sədrliyi ilə keçirilən məhkəmə prosesində elan olunub. Abasquliyeva hökm oxunduqdan sonra məhkəmə zalında həbs edilib.

Eyni iş üzrə təqsirləndirilən şəxslərdən Hamlet Mustafayev 5 il 8 ay, Elnur Əhmədli isə 5 il 2 ay müddətinə azadlıqdan məhrum edilib.

Daha əvvəl keçirilən məhkəmə iclaslarından birində dövlət ittihamçısı Abasquliyevanın 8 il, Mustafayev və Əhmədlinin isə hər birinin 7 il müddətinə azadlıqdan məhrum edilməsini və məhkəmə zalında həbs olunmalarını tələb etmişdi.

2024-cü il yanvarın 9-da Respublika Perinatal Mərkəzinin inzibati binasında baş vermiş yanğınla bağlı Baş Prokurorluq tərəfindən Cinayət Məcəlləsinin müxtəlif maddələri ilə cinayət işi başlanıb və istintaq Baş Prokurorluğun İstintaq İdarəsinə həvalə olunub.

İstintaqın nəticələrinə görə, yanğın mərkəzin Anesteziologiya, reanimasiya və intensiv terapiya şöbəsinin yenidoğulmuşların intensiv terapiya bölməsinin yerləşdiyi dördüncü mərtəbədəki palatada baş verib. Hadisə nəticəsində yeddi yeni doğulmuş körpə ölüb, dörd nəfər xəsarət alıb və müəssisəyə 361 min manat məbləğində maddi ziyan dəyib.

Abasquliyeva ağır nəticələrə səbəb olan vəzifə səlahiyyətlərindən sui-istifadə və yanğın təhlükəsizliyi qaydalarını pozma, Mustafayev və Əhmədli isə yanğın təhlükəsizliyi qaydalarını pozma maddələri ilə təqsirli biliniblər.

Aytac Zeynalova