BAEA İrandakı AES-ə hücumla bağlı araşdırmaya başlayıb - Yenilənib

Beynəlxalq Atom Enerjisi Agentliyi (BAEA) İranın "Darkhovin" Atom Elektrik Stansiyasının (AES) tikinti sahəsinə gecə saatlarında edilən hücumla bağlı məlumatları araşdırdığını bildirib.

Agentliyin "X" sosial şəbəkəsində yaydığı məlumata görə, obyekt tikintinin ilkin mərhələsindədir və BAEA-nın son inspeksiyası zamanı ərazidə nüvə materialı olmayıb.

BAEA bildirib ki, hazırkı qiymətləndirməyə əsasən, hadisənin radioloji risk yaratdığı güman edilmir. Bununla yanaşı, qurumun baş direktoru Rafael Qrossi nüvə obyektlərinin yaxınlığında hərbi əməliyyatların yolverilməzliyi ilə bağlı çağırışını bir daha təkrarlayıb.

Agentlik əlavə edib ki, İranla əlaqə saxlanılıb və yeni məlumatlar əldə olunduqca ictimaiyyətə təqdim ediləcək. 

***

İranın Atom Enerjisi Təşkilatı (İAET) ABŞ-nin "Darkhovin" Atom Elektrik Stansiyasına (AES) hücumunu pisləyib.Bu barədə İAET-yə istinadən İslam İnqilabı Keşikçiləri Korpusu (SEPAH) "Telegram" kanalında məlumat yayıb.

"ABŞ beynəlxalq hüquqa zidd olan akt törədib", - məlumatda bildirilib.

Bazar günü yerli vaxtla səhər saat 3:39 radələrində Amerika qüvvələri inşası davam edən "Darkhovin" AES-ə zərbə endirib.

Dağıntı və dəyən ziyan barədə məlumat açıqlanmayıb.