Ukrayna və Kanada 100 illik tərəfdaşlıq haqqında bəyannamə imzalayıblar

Ukrayna Prezidenti Volodimir Zelenski və Kanadanın Baş naziri Mark Karni Kalgari şəhərində iki ölkə arasında 100 illik tərəfdaşlıq haqqında Bəyannamə və bir sıra digər ikitərəfli sənədlər imzalayıblar.Bu barədə Kanada hökumətinin saytında yayımlanan birgə bəyanatda bildirilib.

Bəyanata əsasən, sənədlər iqtisadi, siyasi və təhlükəsizlik sahələrində əməkdaşlığın dərinləşdirilməsini, həmçinin Ukraynada ədalətli və davamlı sülhün dəstəklənməsini nəzərdə tutur.

Tərəflər Ukraynanın təhlükəsizliyinin Avro-Atlantik təhlükəsizliyin ayrılmaz hissəsi olduğunu və ölkənin gələcəyinin NATO-da olduğunu təsdiqləyiblər. Onlar həmçinin Ukraynanın Avropa İttifaqı və NATO-ya üzvlük istiqamətində islahatları davam etdirməsinin vacibliyini vurğulayıblar.

Kanada və Ukrayna kəşfiyyat, kibermüdafiə, pilotsuz uçuş aparatlarına qarşı mübarizə, elektron müharibə, hibrid təhdidlər və xarici informasiya manipulyasiyasına qarşı mübarizə sahələrində əməkdaşlığı genişləndirəcəklər.

Ölkələr pilotsuz sistemlərin, PUA-lara qarşı vasitələrin və döyüş sursatlarının birgə istehsalını nəzərdə tutan uzunmüddətli müdafiə sənayesi tərəfdaşlığı yaradacaqlar. Bu əməkdaşlıq 24 avqust 2025-ci ildə Kiyevdə imzalanmış birgə istehsala dair niyyət məktubuna əsaslanacaq və tədqiqatlarla yanaşı texnologiya transferini də əhatə edəcək.

Kanada həmçinin Rusiyaya qarşı iqtisadi təzyiqi davam etdirəcək və “Yeddilik Qrupu” ölkələri ilə birlikdə Rusiyanın dondurulmuş aktivlərindən Ukraynanın xeyrinə istifadə imkanlarını araşdıracaq.

Tərəflər müdafiə innovasiyaları, iqtisadi artım və bərpa, eləcə də insanlararası əlaqələrə əsaslanan Hərtərəfli Strateji Tərəfdaşlıq Sazişinin hazırlanması üzərində işləmək barədə də razılığa gəliblər.