Ceyhun Bayramov Pan-Afrika Parlamentinin prezidenti ilə görüşüb

Azərbaycanın xarici işlər naziri Ceyhun Bayramov Azərbaycanda səfərdə olan Pan-Afrika Parlamentinin prezidenti Fateh Butbiqin rəhbərlik etdiyi nümayəndə heyəti ilə görüşüb.Bu barədə Azərbaycan Xarici İşlər Nazirliyi məlumat yayıb.

Görüşdə Azərbaycan ilə Afrika ölkələri arasında əlaqələrin inkişafı, parlamentlərarası əməkdaşlıq və beynəlxalq platformalarda qarşılıqlı fəaliyyət məsələləri müzakirə olunub.

Bayramov son illərdə Azərbaycan ilə Afrika ölkələri arasında münasibətlərin dinamik inkişaf etdiyini bildirib. O, qarşılıqlı səfərlərin, siyasi məsləhətləşmələrin və parlamentlərarası əlaqələrin genişləndirilməsinin əhəmiyyətini vurğulayıb.

Nazir Azərbaycanın Afrika ölkələri ilə əməkdaşlığın inkişafına xüsusi önəm verdiyini qeyd edib və müxtəlif sahələrdə yeni əməkdaşlıq imkanlarının araşdırıldığını bildirib.

Bayramov Milli Məclis ilə Pan-Afrika Parlamenti arasında imzalanmış anlaşma memorandumunun əhəmiyyətini vurğulayıb. O, parlament diplomatiyasının inkişafı və parlamentlərarası əlaqələrin möhkəmləndirilməsi istiqamətində görülən işlərdən danışıb.

Tərəflər Azərbaycanın beynəlxalq və regional platformalardakı fəaliyyəti, o cümlədən Qoşulmama Hərəkatına sədrliyi dövründə həyata keçirilən təşəbbüslər barədə fikir mübadiləsi aparıblar.

Nazir Azərbaycanın COVID-19 pandemiyası dövründə 80-dən çox ölkəyə maliyyə və humanitar yardım göstərdiyini, həmçinin inkişaf etməkdə olan ölkələrə dəstək istiqamətində həyata keçirilən təşəbbüslərdən danışıb.

Görüşdə Azərbaycanın COP29 sədrliyi çərçivəsində Afrika ölkələrinin iqlim maliyyəsinə çıxışının genişləndirilməsi istiqamətində görülən işlər də müzakirə olunub.

Ceyhun Bayramov Cənubi Qafqazda sülh və təhlükəsizliyin təmin olunması, eləcə də Azərbaycanın işğaldan azad edilmiş ərazilərində həyata keçirilən bərpa və yenidənqurma işləri barədə məlumat verib.

Tərəflər Azərbaycan ilə Afrika ölkələri arasında enerji, nəqliyyat, kənd təsərrüfatı, mədən sənayesi, təhsil və humanitar sahələrdə əməkdaşlıq perspektivlərini də müzakirə ediblər.

Fateh Butbiq Azərbaycanın Afrika qitəsi ilə əlaqələrin inkişafına verdiyi önəmi və parlament diplomatiyasının gücləndirilməsi istiqamətindəki təşəbbüslərini yüksək qiymətləndirib.

Görüşdə qarşılıqlı maraq doğuran digər məsələlər ətrafında da fikir mübadiləsi aparılıb.