DTX terror və sui-qəsd cəhdinin qarşısını alıb

Dövlət Təhlükəsizliyi Xidməti (DTX) Azərbaycan və xarici ölkə vətəndaşlarının gizli təşkilatlanma, terror aktlarına hazırlıq və terrorçuluğun maliyyələşdirilməsi ilə bağlı cinayətkar şəbəkəsini aşkar edib.

Əvvəllər “Sumqayıt camaatı” tərkibində məhkum olunmuş Vüqar Abdullayev və digər şəxslər Azərbaycanda ictimai və dini xadimlərə qarşı sui-qəsdlər törətmək məqsədilə cinayət əlaqəsinə giriblər. Şəbəkə üzvləri hədəf seçdikləri şəxslərin hərəkət marşrutlarını izləyib və cinayətdən sonra xaricdəki münaqişə zonalarına qaçmağı planlaşdırıblar.

Eyni zamanda, cinayətkar birliyin üzvü Cəlal Hacıyev və xaricdəki əlaqələri vasitəsilə beynəlxalq terror təşkilatlarının kriptovalyuta sistemləri ilə maliyyələşdirilməsi təşkil edilib.

Xarici tərəfdaşlarla birgə 5 ölkədə keçirilən paralel əməliyyatlar nəticəsində qruplaşmanın 10 üzvü saxlanılıb, onlardan Elşən Əsgərov Azərbaycana ekstradisiya olunub. Saxlanılan şəxslər barəsində məhkəmə qərarı ilə həbs qətimkan tədbiri seçilib.