Bu gün Azərbaycanda Dövlət Suverenliyi Günüdür

Bu gün Azərbaycanda Dövlət Suverenliyi Günü qeyd olunur.

Prezident İlham Əliyev 2024-cü il sentyabrın 19-da imzaladığı Sərəncamla sentyabrın 20-ni Dövlət Suverenliyi Günü elan edib.

Dövlət Suverenliyi Gününün təsis edilməsi 2023-cü il sentyabrın 19–20-də Qarabağda keçirilmiş lokal xarakterli antiterror tədbirlərinin nəticələri ilə bağlıdır.

Azərbaycan Silahlı Qüvvələrinin keçirdiyi antiterror tədbirləri 23 saat 43 dəqiqə davam edib. Əməliyyat nəticəsində Qarabağdakı Ermənistan silahlı qüvvələrinin birləşmələrinin mövqeləri və hərbi obyektləri sıradan çıxarılıb.

2023-cü il sentyabrın 20-də Prezident İlham Əliyev xalqa müraciət edərək antiterror tədbirlərinin başa çatdığını və Azərbaycanın suverenliyinin bərpa olunduğunu açıqlayıb.

Bundan sonra Qarabağda yerləşən Ermənistan silahlı qüvvələrinin birləşmələrinin tərksilah edilərək bölgədən çıxarılması prosesi həyata keçirilib. Azərbaycan hüquq-mühafizə orqanlarının keçirdiyi əməliyyatlar nəticəsində separatçı rejimin bir sıra rəhbərləri saxlanılıb.

Beləliklə, Azərbaycan hakimiyyətinin məlumatına görə, ölkənin bütün ərazisində dövlət suverenliyi və Konstitusiya quruluşu bərpa olunub.