Black Sea Energy" üzrə danışıqlar noyabrda keçiriləcək

"Black Sea Energy Cables" yaşıl enerji dəhlizinin inkişafı üzrə növbəti danışıqlar noyabrın sonunda baş tutacaq. Bunu Bakıda keçirilən Alman-Azərbaycan Strateji Tərəfdaşlıq və Bağlantılar Konfransında "Green Energy Corridor Power Operating Company" (GECO) birgə müəssisəsinin yeni icraçı direktoru Yusif Qayıbov bildirib.

O qeyd edib ki, Azərbaycan yaşıl enerjisinin Gürcüstan və Qara dəniz vasitəsilə Rumıniya, Macarıstan və Bolqarıstana nəqlini nəzərdə tutan təşəbbüs çərçivəsində iştirakçı dövlətlərin nazirləri və aidiyyəti qurumların rəhbərləri indiyədək 12 dəfə görüşüblər, növbəti nazirlər toplantısı isə 2026-cı ilin noyabr ayının sonuna planlaşdırılıb.

Qayıbov layihənin mürəkkəb xarakter daşıdığını, birgə müəssisənin 2024-cü ildən fəaliyyət göstərdiyini və iştirakçı ölkələrin bir hissəsinin artıq mövcud elektrik şəbəkələri ilə bağlı olduğunu vurğulayıb.

Onun sözlərinə görə, təşəbbüsün uğurla reallaşması üçün beynəlxalq maliyyə institutları, banklar və özəl sektorun riskləri bölüşərək cəlb olunması həlledici rol oynayacaq. Qeyd edək ki, Xəzər regionundan Avropa İttifaqına Qara dənizin dibi ilə 4 QVt-dək yaşıl elektrik enerjisinin ötürülməsini hədəfləyən layihənin dəyəri 10 milyard avrodan çox qiymətləndirilir, tədarükün başlanması isə 2032-ci ilə nəzərdə tutulub.

N. Təbrizli