Əliyev “Sabah”ı Çempionlar Liqasına vəsiqə qazanması münasibətilə təbrik edib

Prezident İlham Əliyev “Sabah” futbol klubunu UEFA Çempionlar Liqasının əsas mərhələsinə vəsiqə qazanması münasibətilə təbrik edib. Prezident bu barədə “X” hesabında paylaşım edib.

“Sabah” avqustun 25-də Bakıda İsrailin “Hapoel Beer-Şeva” klubunu əlavə vaxtda 5:2 hesabı ilə məğlub edərək tarixində ilk dəfə UEFA Çempionlar Liqasının əsas mərhələsinə yüksəlib. Bu, Azərbaycanın turnirin əsas mərhələsində mübarizə aparacaq ikinci klubu olub.

İlham Əliyev paylaşımında klubun qısa müddət ərzində belə böyük nailiyyət əldə etməsinin sevinc və qürur doğurduğunu bildirib.

“Klublarımızın ardıcıl ikinci dəfə dünyanın ən güclü klub turnirinin əsas mərhələsində mübarizə aparmaq hüququ qazanması Azərbaycanın bütün sahələrdə əldə etdiyi tərəqqinin, ölkəmizin idman dövləti kimi mövqeyinin daha bir bariz göstəricisidir”, - Prezident qeyd edib.

O, “Sabah”a qarşıdakı matçlarda yeni qələbələr və uğurlar arzulayıb.