Ukrayna: Spiker koalisiyanın dağıldığını rəsmən elan edib

Ukrayna Ali Radasının spikeri Vladimir Qroysman "Samopomoş” fraksiyasının parlament koalisiyasının tərkibindən çıxdığını rəsmi sürətdə elan edib.

Qroysmanın bildirdiyinə görə, "Samopomoş" deputat fraksiyası "Avropa Ukraynası" koalisiyası tərkibində iştirakını dayandırıb, "fraksiya üzvləri koalisiya müqaviləsindən imzalarını geri çağırıblar".

Bununla da Ukrayna parlamentində hakim koalisiyanın dağılması rəsmiləşdirilib.

Ali Rada spikeri yaranmış vəziyyətdən çıxış yolu tapmaq üçün siyasi məsləhətləşmələrin davam etdiriləcəyini vurğulayıb.

"Samopomoş" fraksiyası parlament koalisiyası tərkibindən çıxmasını Ali Radada "oliqarxlar çevrilişində iştirak etmiş siyasi qüvvələrlə eyni ittifaqda olmamaq istəyilə" izah edib.

Parlamentdə "Samopomoş" fraksiyasını 33 deputat təmsil edir.

Bundan əvvəl Yuliya Timoşenkonun "Batkivşina" və Oleq Lyaşkonun Radikal partiyaları da parlament koalisiyasını tərk etmişdilər.

Bu arada, parlamentdə hökumətə etimadsızlıq səsverməsindən qalib çıxmış Baş nazir Arseni Yatsenyuk, "keçmiş umu-küsünü kənara qoymağa" çağıraraq, prezident Poroşenkonu dəstəkləyən fraksiyalarla əməkdaşlığa hazır oluğunu bildirib. //bbc.com/azeri
www.ann.az