Həbs olunan şahzadələrin saxlanıldığı yerin görüntüləri yayılıb

Anews.az Report-a istinadən xəbər verir ki, onlar krallığın paytaxtı Ər-Riyaddakı "Ritz Carlton” mehmanxanasında saxlanılırlar.

Fotoda ən çox diqqət çəkən şahzadə əl Valid bin Talaldır. Səudiyyə Ərəbistanının ilk kralı olmuş ibn Səud kimi tanınan Əbdüləziz bin-Əbdürrəhmanın nəvəsi şahzadə əl Valid bin-Talal bin Əbdüləziz əl Səud 17 milyard dollar sərvətə malikdir. O, dünyanın ən zəngin 100 adamından biridir. 

Şahzadə əl Valid bin Talal 1955-ci ildə anadan olub. Böyük şirkətlərə sərmayə qoyub. Bu gün isə şahzadə bin Talal müxtəlif cinayətlər törətməkdə ittiham olunaraq Səudiyyə Ərəbistanının ən məşhur otelində saxlanılır.

Qeyd edək ki, Səudiyyə Ərəbistanının Korrupsiyaya qarşı Mübarizə üzrə Ali Komitəsi noyabrın 4-də 11 şahzadəni, fəaliyyətdə olan 4 naziri və 39 keçmiş hökumət üzvünü həbs edib. Həmin şəxslər qanunsuz silah satışı sazişi və saxta müqavilələr imzalamaqda, çirkli pulların yuyulmasında və korrupsiyada ittiham olunaraq həbs olunublar.

Korrupsiyaya qarşı Mübarizə üzrə Ali Komitə noyabrın 4-də kral Salmanın fərmanı ilə yaradılıb. Yeni komitəyə isə Səudiyyə Ərəbistanının varis şahzadəsi Məhəmməd bin Salman başçılıq edir.