Rusiyanın “RuTube” videohostinqi bərpa oluna bilmir

"YouTube”un Rusiya analogiyası olan "RuTube”a edilən kiberhücum nəticəsində videohostinq bərpa oluna bilmir, bu barədə videohostinqin mətbuat xidməti məlumat yayıb.

Haker hücumu nəticəsində əsas versiyanın baza və infrastrukturunun 75 %-i, həmçinin baza məlumatlarının bərpasına lazım olan rezerv surət və klasterlərin 90 %-i zədələnib.

Eyni zamanda Rusiyanın "The Village” nəşrinin məlumatına görə, mayın 9-u baş tutan hücumdan sonra videoservisi bərpa etmək mümkün olmayacaq.

Nəşr bildirib ki, saytın kodu tamamilə silinib. Mənbənin sözlərinə görə, kiberhücum sayta giriş kodlarının sızması səbəbindən mümkün olub.

Mayın 10-da səhər saatlarında "RuTube”un mətbuat xidməti kodun itirilməsi ilə bağlı məlumatın doğru olmadığını açıqlayıb.

Bundan başqa, ötən gecə servisin mətbuat xidməti teleqram üzərindən Ukraynanın rəqəmsal transformasiya naziri Mixail Fyodorova ukrayn dilində müraciət edib.

"Artıq ikinci gündür işləməyən "RuTube” ukraynca danışmağa başlayıb. Kreml (ukrayn dilində) danışanacan işləməyə davam edəcəyik”, -  nazir teleqramda da yazıb.

 

Rusiya hökuməti "RuTube”, "Yandex.Video” və "VKontakte”ni ABŞ-ın "YouTube” video hostinqinin alternativinə çevirmək istəyir.