Çində insanlara yoluxa bilən yeni koronavirus aşkarlanıb- Nə qədər təhlükəlidir?

Çin virusoloqları COVID-19 ilə eyni şəkildə insanlara yoluxa bilən yeni yarasa koronavirusu aşkar ediblər. Bu barədə South China Morning Post məlumat yayıb.

Nəşr qeyd edir ki, bu virus ilk dəfə Honq-Konqda yapon yarasasında aşkar edilmiş HKU5 koronavirusunun yeni nəslidir.

Nəşr vurğulayır ki, Çin  Elmlər Akademiyasının Quançjou filialı,Uhan Universiteti və Uhan Virusologiya İnstitutunun mütəxəssisləri Quançjou laboratoriyasında araşdırma aparıblar.

Yarasa nümunələrindən təcrid olunmuş yeni virus insan hüceyrələrinə yoluxa bilər.

Alimlər bildirirlər ki, hələlik panikaya səbəb yoxdur. HKU5-CoV-2-nin insanlarda ortaya çıxma riskini şişirtmək olmaz, lakin daha ətraflı araşdırmaya ehtiyac var.

Səhiyyə Nazirliyinin mütəxəssis-eksperti, infeksionist Təyyar Eyvazov anews.az-a açıqlamasında bildirib ki, Çində yarasalardan əldə edilən yeni xətt koronavirus –HKU5 –COV-2 haqqında məlumatlar azsaylıdır.

"Virusun insanı yoluxdurması nəzəri olaraq mümkün sayılır, çünki yoluxma vasitəsi kimi bu virus yenikoronavirusla eyni ACE reseptorlarından yararlanır.  Hələ ki, virusun insanda xəstəlik törətməsinin təsdiqi yoxdur. Bu olsa belə, onun insandan insana ötürülməsi qabiliyyətinin aşağı olacağı bildirilir. Yeni xəstəlik törədən virusların əldə edilməsi sıradan fərqli hadisə deyil. Virus ətrafındakı proseslərin nəzarətdə saxlanılması önəmlidir. Hətta bu virus COVID-19 kimi xüsusiyyətlər kəsb etsə də belə, Pandemiya təcrübəsi və effektiv vaksinin qısa zamanda hazırlanaraq tətbiqi az müddət ərzində infeksiyanın lokallaşdırılmasına səbəb ola bilər",-   infeksionist vurğulayıb.

Daha əvvəl Ümumdünya Səhiyyə Təşkilatının (ÜST) hesabatında SARS-CoV-2 koronavirusunun insanlar və heyvanlar arasında dövriyyəsinin yeni təhlükəli virusların yaranması təhlükəsi yaratdığı bildirilirdi. 

İstiqamət: 6.3.17. ekologiya və ətraf mühitin mühafizəsi;Qeyd: Yazı Medianın İnkişafı Agentliyinin maliyyə dəstəyi çərçivəsində hazırlanıb. 

Aytac  Zeynalova