ABŞ “Amerikanın Səsi”ni bağlayır – bütün heyət işdən çıxarılır

ABŞ Prezidenti Donald Trampın administrasiyası bu həftə “Amerikanın Səsi”nin (VOA) qalan bütün əməkdaşlarını işdən azad etməyə hazırlaşır. Bu barədə Politico dörd mənbəyə istinadla məlumat yayıb.

Mayın əvvəlində artıq 600 nəfər ixtisar edilmişdi. Yeni mərhələdə isə təxminən 800 nəfərin işdən çıxarılması planlaşdırılır ki, bu da agentliyin fəaliyyətinin tam dayandırılması deməkdir.

Mənbələrdən biri bildirib ki, bu ixtisarlar “Amerikanın Səsi”nin tam bağlanacağına işarədir.

ABŞ Qlobal Media Agentliyi (USAGM) və Ağ Ev bu məsələ ilə bağlı şərh verməkdən imtina edib.

Martda Trampın imzaladığı sərəncamla yeddi federal agentliyin, o cümlədən USAGM-in maliyyələşdirilməsi dayandırılıb.

Ağ Ev “Amerikanın Səsi”ni “radikal təbliğat yaymaqda” günahlandırıb.

Təşkilat bu qərara qarşı məhkəməyə müraciət etsə də, iddia rədd edilib.

Bloomberg yazır ki, Tramp administrasiyası həmçinin VOA-nın Vaşinqtondakı qərargah binasını satışa çıxarmağı planlaşdırır.

N.Təbrizli